ຄວາມເຈັບປວດໃນວັນນັ້ນມາເປັນແຮງຜັກດັນໃນວັນນີ້

ເລື່ອງລາວດີໆຈາກໄຣເດີ້ຜູ້ສູ້ຊີວິດ. ຈາກເອຶື້ອຍສຸດໃຈ

· ສະບາຍດີເອື້ອຍ ຊ່ວຍແນະນຳໂຕເອງໃຫ້ເຮົາຮູ້ຈັກແນ່

ສະບາຍດີ ເອື້ອຍຊື່ ນາງ ສຸດໃຈ ພັນທະວົງ ເອື້ອຍເປັນໄຣເດີ້ຂອງ ຟູດແພນດ້າ, ເອຶ້ອຍເຮັດຢູ່ໂຄງການ ”ຂັບຂີ່ປອດໄພ ແລະ ເອື້ອຍໄດ້ສູນເສຍຂາຂ້າງຫນຶ່ງ ເນື່ອງຈາກອຸບັດຕິເຫດ.

· ກ່ອນເອື້ອຍຈະມາເຮັດວຽກນຳໂຄງການຂັບຂີ່ປອດໄພເອື້ອຍເຮັດຫຍັງມາກ່ອນ?

ກ່ອນຈະມາເປັນວິຊາການເຮັດລໍ້ເລື່ອນຊ່ວຍເຫລືອຄົນພິການ ກັບອົງການ JICA ເອື້ອຍເຮັດຢູ່ຫັ້ນເປັນເວລາ 12 ປີ. ຫລັງຈາກສິ້ນສຸດໂຄງການ ເອື້ອຍກໍ່ມາເຮັດວຽກນຳ ໂຄງການຂັບຂີ່ປອດໄພບົນທ້ອງຖະຫນົນ (Road safety) ຂອງອົງການ handicap international ຈົນຮອດປີ 2017 ແມ່ນໄດ້ສິ້ນສຸດໂຄງການ. ແລ້ວຫລັງຈາກນັ້ນ ແມ່ນໄດ້ສືບຕໍ່ເຄື່ອນໄຫວຮ່ວມກັບ ກະຊວງໂຍທິການ ແລະ ຂົນສົ່ງ ແລະ ປກສ ນະຄອນຫລວງ.

· ເອື້ອຍມາເຮັດວຽກນຳໂຄງການ “ຂັບຂີ່ປອດໄພ” ເປັນແນວໃດ?

ຕອນນັ້ນແມ່ນໂຄງການ ”ເມົາບໍ່ຂັບ” ຂອງປະເທດໄທ ເພິ່ນມາເກັບກຳຂໍ້ມູນວ່າມີຜູ້ໃດເກີດອຸບັດຕິເຫດຕາມທ້ອງຖະຫນົນ ແລ້ວລອດຊີວິດມາໄດ້ແນ່. ແລ້ວໃຫ້ມາແບ່ງປັນປະສົບການໃຫ້ກັບຜູ້ຂັບຂີ່ ທີ່ຍັງບໍ່ທັນເຄີຍເກີດອຸບັດຕິເຫດ.ຈາກນັ້ນ ແມ່ນລວມກຸ່ມກັນແລ້ວໄປລົນນະລົງ ຕາມມະຫາວິທະຍາໄລ, ສຳນັກງານຫ້ອງການ ແລະ ອີກຫລາຍບ່ອນ.

· ແລ້ວດຽວນີ້ເອື້ອຍຍັງໄດ້ເຄື່ອນໄຫວຄືເກົ່າບໍ່?

ດຽວນີ້ເອຶ້ອຍກໍ່ມີແຕ່ຮ່ວມເຄື່ອນໄຫວນຳເພິ່ນຢູ່ ຫຼັກໆແມ່ນຈະເຄື່ອນໄຫວຕາມການເທດສະການໃຫຍ່ຕ່າງໆ ເຊັ່ນ: ບຸນຊ່ວງເຮືອ ແລະ ບຸນທາດຫລວງ.

 

103096413_713857802780469_67529996709738
102661807_696299974552440_34467752930023
101540491_2688890898058455_6206085811230

· ເອື້ອຍມາເປັນໄຣເດີ້ຂອງຟູດແພນດ້າໄດ້ແນວໃດ?

ກ່ອນເອື້ອຍຈະມາເຮັດວຽກຢູ່ນຳບ່ອນນີ້ ແມ່ນເອື້ອຍໄດ້ເຄີຍເຮັດວຽກນຳບໍລິສັດສົ່ງອາຫານແຫ່ງໜຶ່ງມາກ່ອນ. ຫລັງຈາກ ບໍລິສັດນັ້ນປິດໂຕໄປ ເອື້ອຍກໍ່ໄດ້ມາເຮັດວຽກຢູ່ນຳຟູດແພນດ້າ.

· ເຮັດວຽກກັບຟູດແພນດ້າເປັນແນວໃດ?

ເປັນໄຣເດີ້ຢູ່ນີ້ກໍ່ມີຄວາມມ່ວນຊື່ນດີ, ໄດ້ພົບກັບມິດຕະພາບໃຫມ່ໆໃນຫມູ່ໄຣເດີ້ນຳກັນ ໄດ້ຄົ້ນຫາວ່າເມືອງທີ່ເຮົາອາໄສຢູ່ນັ້ນມີຫຍັງແດ່ທີ່ຫນ້າສົນໃຈ ແລະ ພົບກັບເລື່ອງລາວໃນແຕ່ລະວັນລະຫວ່າງທີ່ເຮົາເຮັດວຽກ ເຊິ່ງມີທັງດີ ແລະ ບໍ່ດີປົນເປກັບໄປ.

· ເອື້ອຍຢາກຝາກຫຍັງເຖິງໄຣເດີ້ເຮົາບໍ່?

ສິ່ງທີ່ເອື້ອຍຢາກຝາກ ກໍ່ແມ່ນໃນເລື່ອງການຂັບຂີ່ລົດຂອງໄຣເດີ້ຫັ້ນ ແລະ ເພາະເອື້ອຍເຫັນຫລາຍຄົນທີ່ຂັບຂີ່ລົດ ແມ່ນຍັງບໍ່ປະຕິບັດຕາມກົດລະບຽບຈະລາຈອນຢູ່ ເພາະເອື້ອຍກໍເຮັດວຽກກັບ “ຂັບຂີ່ປອດໄພ” ແລະ ເອື້ອຍກໍ່ແມ່ນຜູ້ໜຶ່ງທີ່ເຄີຍປະສົບອຸບັດຕິເຫດມາເຊັ່ນກັນ ເອື້ອຍຮູ້ດີວ່າຄວາມເຈັບປວດເຫຼົ່ານັ້ນມັນເປັນແບບໃດ.

· ເອື້ອຍມີຫຍັງທີ່ຢາກຝາກເຖິງຄົນອ່ານບໍ່?

ສິ່ງທີ່ເອື້ອຍຢາກຝາກເຖີງຄົນອ່ານແມ່ນເອື້ອຍຢາກໃຫ້ທຸກຄົນສູ້ຊີວິດເຊັ່ນກັນກັບເອື້ອຍ, ຂະຫນາດເອື້ອຍເປັນຄົນພິການ ເອື້ອຍກໍ່ຍັງສູ້ມາເຖິງສ່ຳນີ້ ແລະ ເອື້ອຍສາມາດລ້ຽງລູກສອງຄົນຈົນໃຫຍ່ໄດ້.